បទយកការណ៍៖ «ខែលការពារខ្លួនរបស់យុវជន ក្នុងយុគសម័យបច្ចេកវិទ្យាឌីជីថល»
រៀងរាល់ព្រឹកថ្ងៃចន្ទដល់ថ្ងៃសៅរ៍ សិស្សានុសិស្សនៅវិទ្យាល័យព្រះបិតាជាតិ ក្នុងស្រុកកំពង់ត្រាច តែងតែឮស្នូរជួងរំពងឡើង ដើម្បីហៅពួកគេឱ្យប្រមូលផ្តុំគ្នាជាជួរមកគោរពទង់ជាតិ ហើយបន្ទាប់មកក៏បែកផ្លូវគ្នាដើរចូលទៅកាន់បន្ទប់សិក្សារៀងៗខ្លួន។ ប៉ុន្តែអ្វីៗប្រែជាខុសប្លែកពីសព្វមួយដង! បន្ទាប់ពីគោរពទង់ជាតិត្រូវបានបញ្ចប់ទៅ ប្អូនៗសិស្សានុសិស្សមិនទាន់ត្រូវបានអនុញ្ញាតឱ្យចូលទៅកាន់បន្ទប់រៀននៅឡើយទេ។ ជំនួសមកវិញ ពួកគេត្រូវចូលរួមក្នុងព្រឹត្តិការណ៍ដ៏ធំមួយគឺ «យុទ្ធនាការនិយាយថាទេចំពោះព័ត៌មានក្លែងក្លាយ»ជំហានទី២ ដែលសម្របសម្រួលដោយមន្ទីរព័ត៌មានខេត្តកំពត។ នេះមិនមែនជាការរំខានដល់ម៉ោងសិក្សានោះទេ ប៉ុន្តែវាជាការបើកទំព័រថ្នាក់រៀនដ៏ធំមួយនៅក្រោមផ្ទៃមេឃស្រទុំ ដើម្បីបំពាក់ «ខែលការពារខ្លួន» ជូនដល់យុវជនជំនាន់ក្រោយ នៅក្នុងយុគសម័យឌីជីថល។
