អាជ្ញាធរស្រុកបន្ទាយមាសបានបញ្ជាក់ថា រដ្ឋបាលស្រុកបាន និងកំពុងរៀបចំតំបន់ផ្លូវជាតិលេខ៣១ ជាប់ជួរភ្នំបន្ទាយមាស ឲ្យក្លាយទៅជាតំបន់ទេសចរណ៍ដ៏ទាក់ទាញសម្រាប់ភ្ញៀវជាតិ និងអន្តរជាតិ ដោយសារតំបន់នោះ មានទេសភាពស្អាត លម្អដោយធម្មជាតិវាលស្រែចម្ការ ទេសភាពភ្នំ ផ្លូវរថភ្លើង ប្រឡាយទឹក និងគុហារដែលជាជម្រកហ្វូងប្រចៀវរាប់ម៉ឺនក្បាល សម្រាប់ឲ្យភ្ញៀវទស្សនា។
អធិការស្រុកបន្ទាយមាសបានបញ្ជាក់ថា រយៈពេល៩ខែ ឆ្នាំ២០២៦ សមត្ថកិច្ចជំនាញបាន បំពេញបែបបទធ្វើអត្តសញ្ញាណប័ណ្ណសញ្ជាតិខ្មែរ ជូនប្រជាពលរដ្ឋចំនួន១៤,០៨៥នាក់ ព្រមទាំងចែកជូនអត្តសញ្ញាណប័ណ្ណដែលបានទទួលពីការិយាល័យជំនាញចំនួន១៣,០៩៦សន្លឹក។ ពលរដ្ឋបានសម្តែងសេចក្តីសប្បាយរីករាយ និងកក់ក្តៅក្នុងការមកស្នើរ និងទទួលសេវានៅអធិកាដ្ឋាន ក៏ដូចជាប៉ុស្តិ៍រដ្ឋបាល។
កំពត៖ សមត្ថកិច្ចនគរបាលស្រុកបន្ទាយមាស បានឱ្យដឹងថា ស្ថានភាពសន្តិសុខ សណ្តាប់ធ្នាប់សាធារណៈនៅក្នុងមូលដ្ឋាន មានភាពល្អប្រសើរ ខណៈបទល្មើសផ្សេងៗ និងគ្រោះថ្នាក់ចរាចរណ៍ ត្រូវបានបង្ការ ទប់ស្កាត់ និងបង្ក្រាបទាន់ពេលវេលា រហូតមានការថយចុះច្រើន។ យ៉ាងណាក៏ដោយ អាជ្ញាធរ និងកម្លាំងនគរបាលនៅតែបន្តបង្កើនការផ្សព្វផ្សាយអប់រំប្រជាពលរដ្ឋ និងសិស្សានុសិស្ស ដើម្បីឲ្យពួកគេចូលរួមចំណែករក្សាសន្តិសុខ និងសុវត្ថិភាពក្នុងសហគមន៍របស់ខ្លួន។
ប្រជាពលរដ្ឋនៅស្រុកបន្ទាយមាសបានលើកឡើងថា ការបង្កើតយន្តការច្រកចេញចូលតែមួយនៅថ្នាក់ស្រុក គឺជាយន្តការបង្ខិតសេវាកាន់តែកៀកកិត ងាយស្រួល លឿនរហ័ស និងជឿទុកចិត្តបាន ដោយការស្នើសុំ និងទទួលសេវានៅហ្នឹងកន្លែងតែមួយ រួមចំណែកកាត់បន្ថយពេលវេលា និងថវិការបស់ពួកគាត់ ឆ្លើយតបសេចក្ដីត្រូវការរបស់ប្រជាពលរដ្ឋទូទៅ ។
អាជ្ញាធរ និងមន្ត្រីជំនាញថា មណ្ឌលសុខភាពទូកមាសបានដើរតួនាទីយ៉ាងសំខាន់ក្នុងការលើកកម្ពស់សុខុមាលភាពប្រជាពលរដ្ឋស្រុកបន្ទាយមាស ដោយសារស្រុកនេះគ្មានមន្ទីរពេទ្យបង្អែកទេ។ ហើយដើម្បីឆ្លើយតបតម្រូវការពលរដ្ឋ និងពង្រឹងប្រសិទ្ធភាពការងារឲ្យកាន់តែប្រសើរថ្មីៗនេះឯកឧត្តមអភិបាលខេត្តបានផ្តល់អគារ១ខ្នង និងរថយន្ត១គ្រឿងបន្ថែមដល់មណ្ឌលសុខភាពទូកមាសនេះ ខណៈប្រជាពលរដ្ឋបានសម្តែងការពេញចិត្ត និងជឿជាក់យ៉ាងខ្លាំងចំពោះការផ្តល់សេវារបស់ក្រុមគ្រូពេទ្យ។
