កំពត៖ នាព្រឹកថ្ងៃទី១៨ ខែតុលា ឆ្នាំ២០២៦ លោក អូន ខន អភិបាលស្រុកកំពង់ត្រាច និងលោក សោម យ៉ាន ប្រធានក្រុមប្រឹក្សាស្រុក បានដឹកនាំក្រុមការងាររដ្ឋបាលស្រុក និងអាជ្ញាធរមូលដ្ឋាន ចូលរួមរំលែកទុក្ខយ៉ាងក្រៀមក្រំ និងនាំយកថវិកាបច្ច័យចំនួន ១,០០០,០០០ រៀល ប្រគល់ជូនក្រុមគ្រួសារសពលោកតា ចឹក ស៊ង មេភូមិច្រនៀង ដែលបានទទួលមរណភាពដោយជរាពាធ នៅគេហដ្ឋានរបស់សព ស្ថិតក្នុងភូមិច្រនៀង ឃុំភ្នំប្រាសាទ ស្រុកកំពង់ត្រាច ខេត្តកំពត។

ដោយមើលឃើញពីសក្តានុពលរបស់ខេត្តកំពត ពាក់ព័ន្ធនឹងការវិនិយោគរបស់ខ្លួន ក្រុមហ៊ុនចំនួន១២ បានធ្វើការចុះកិច្ចព្រមព្រៀងចូលរួមវិនិយោគនៅក្នុងតំបន់សេដ្ឋកិច្ចពិសេស កំពត ហ្វូជាន ដែលមានទីតាំងស្ថិតក្នុងស្រុកជុំគិរី ខេត្តកំពត។ នេះជាលទ្ធផលដ៏មានតម្លៃមួយក្នុតដំណើរទស្សនកិច្ចរបស់គណៈប្រតិភូខេត្តកំពតមកកាន់ខេត្តហ្វូជាន សាធារណរដ្ឋប្រជាមានិតចិន ហើយលទ្ធផលនេះនឹងនាំយកការងារជូនបងប្អូនប្រជាពលរដ្ឋក្នុងខេត្តកំពតបានកាន់តែច្រើនបន្ថែមទៀត។

ប្រទេសចិន៖ នៅរសៀលថ្ងៃទី១៨ ខែតុលា ឆ្នាំ២០២៦ ឯកឧត្តម ម៉ៅ ធនិន អភិបាល នៃគណៈអភិបាលខេត្តកំពត បានដឹកនាំប្រតិភូរដ្ឋបាលខេត្ត អញ្ជើញធ្វើដំណើរទស្សនកិច្ចនៅតំបន់ទេសចរណ៍ «៦៨ ម៉ាយសមុទ្រ» (68 Nautical Miles Scenic Area) និង «ទីក្រុងតៃវ៉ាន់» (Pingtan Taiwan Small Town) ស្ថិតក្នុងក្រុងភីងថាន ខេត្តហ្វូជៀន សាធារណរដ្ឋប្រជាមានិតចិន ក្នុងគោលបំណងពង្រឹងចំណងមិត្តភាព និងលើកកម្ពស់កិច្ចសហប្រតិបត្តិការលើវិស័យពាណិជ្ជកម្ម វិនិយោគ និងទេសចរណ៍រវាងតំបន់ទាំងពីរឱ្យកាន់តែជិតស្និទ្ធ និងមានប្រសិទ្ធភាពខ្ពស់បន្ថែមទៀត តាមរយៈការផ្លាស់ប្តូរបទពិសោធន៍ជាក់ស្តែង។

កំពត៖ ឯកឧត្តមបណ្ឌិត មាស បូរ៉ា រដ្ឋលេខាធិការ នៃរដ្ឋលេខាធិការដ្ឋានកិច្ចការព្រំដែន និងជាសាកលវិទ្យាធិការនៃសាកលវិទ្យាល័យឯកទេសនៃកម្ពុជា (CUS) បានលើកទឹកចិត្តដល់សិស្ស និស្សិត និងមនុស្សគ្រប់រូបឱ្យបន្តការសិក្សា ស្រាវជ្រាវ និងអភិវឌ្ឍសមត្ថភាពជាប្រចាំ ពេញមួយជីវិត ដើម្បីកសាងអាជីពឱ្យបានច្បាស់លាស់ និងបង្កើនឱកាសទទួលបានការងារល្អ។ ជាពិសេស ក្នុងសម័យឌីជីថលដែលបច្ចេកវិទ្យាបញ្ញាសិប្បនិម្មិត (AI) កំពុងមានតួនាទីកាន់តែសំខាន់ ការបន្តរៀនសូត្រ និងពង្រឹងជំនាញថ្មីៗ គឺជាកត្តាចាំបាច់សម្រាប់ការអភិវឌ្ឍខ្លួន និងការងារនាពេលអនាគត។

កំពត៖ នៅព្រឹកថ្ងៃទី១៣ ខែតុលា ឆ្នាំ២០២៦ លោកជំទាវ មុយ វិរ័ត្ន អភិបាលរងខេត្តកំពត តំណាងលោក ម៉ៅ ធនិន អភិបាលខេត្ត បាននាំយកអំណោយសង្គ្រោះបន្ទាន់ជាសម្ភារប្រើប្រាស់ គ្រឿងឧបភោគបរិភោគ និងថវិកា ទៅចែកជូនប្រជាពលរដ្ឋចំនួន ៤គ្រួសារ ដែលរងគ្រោះដោយសារគ្រោះអគ្គិភ័យឆេះផ្ទះ ស្ថិតនៅក្នុងឃុំត្រពាំងធំ ស្រុកទឹកឈូ ខេត្តកំពត ដើម្បីជួយសម្រាលទុក្ខលំបាក និងដោះស្រាយជីវភាពចំពោះមុខ។

កំពត៖ អភិបាលខេត្តកំពតបានដាក់បទបញ្ជាដល់អាជ្ញាធរមូលដ្ឋាន ពិសេសមន្ទីរជំនាញ ចុះតាមដាន និងពិនិត្យលើការអនុវត្តសៀវភៅបន្ទុក​របស់អ្នកវិនិយោគផ្សារទាំងអស់នៅទូទាំងខេត្ត ដើម្បីឱ្យបានដឹងថា តើកន្លងមកបានអនុវត្តត្រឹមត្រូវដែរឬទេ ហើយការអភិវឌ្ឍផ្សារដើម្បីផ្តល់ភាពងាយស្រួលដល់អាជីវករក្នុងការលក់ដូរដែរឬទេ។ ហើយប្រសិនបើរកឃើញថា អ្នកវិនិយោគផ្សារនោះ មិនបានអនុវត្តន៍ត្រឹមត្រូវ​តាមសៀវភៅបន្ទុកនោះទេ និងត្រូវបញ្ចប់កិច្ចសន្យា ហើយយកអ្នកវិនិយោគថ្មីមកគ្រប់គ្រងដើម្បីផ្តល់ភាពកក់ក្តៅដល់អាជីវករ។