កំពត៖ នាព្រឹកថ្ងៃទី២២ ខែតុលា ឆ្នាំ២០២៦ ឯកឧត្តម ម៉ៅ ធនិន អភិបាលនៃគណៈអភិបាលខេត្តកំពត បានបន្តផ្តល់របបឧបត្ថម្ភជាថវិកាព្រមទាំងអង្ករប្រចាំខែ ជូនដល់ប្រជាពលរដ្ឋនៅសាលាខេត្តកំពត ដើម្បីចូលរួមសម្រាលបន្ទុក និងទ្រទ្រង់ជីវភាពរស់នៅរបស់គ្រួសារប្រជាពលរដ្ឋដែលមានជីវភាពខ្វះខាត។

កំពត៖ មន្ទីរធនធានទឹក និងឧតុនិយមខេត្តកំពត នៅថ្ងៃទី២១ ខែតុលា ឆ្នាំ២០២៦ នេះ បានចេញលិខិតជូនដំណឹងស្ដីពីការឈានចូលដល់ដំណាក់កាលរដូវរំហើយ និងការប្រែប្រួលស្ថានភាពអាកាសធាតុនៅក្នុងភូមិសាស្ត្រខេត្តកំពត ដោយបានអំពាវនាវដល់ប្រជានេសាទ អ្នកធ្វើដំណើរតាមផ្លូវទឹក និងប្រតិបត្តិករទេសចរណ៍សមុទ្រទាំងអស់ ឱ្យបង្កើនការប្រុងប្រយ័ត្នខ្ពស់ ដើម្បីចៀសវាងគ្រោះថ្នាក់ផ្សេងៗ ដែលអាចកើតមានឡើងជាយថាហេតុ។

កំពត៖ ជំរឿនមិនមែនជាការស្វែងរកកំហុស ជាការរើសអើង ឬជាការសើរើឯកសារចាស់ៗដើម្បីមានចំណាត់ការដាក់ពិន័យជាទណ្ឌកម្មណាមួយឡើយ តែជាការធ្វើបច្ចុប្បន្នភាពទិន្នន័យមន្ត្រីដោយពិនិត្យផ្ទៀងផ្ទាត់វត្តមាននៅតាមអង្គភាពនីមួយៗដើម្បីរៀបចំផែនការ និងសមាសភាពក្នុងការពង្រាយមន្ត្រីបម្រើការងារឲ្យចំគោលដៅតាមរយៈការត្រួតពិនិត្យជាក់ស្តែង។ នេះជាការបញ្ជាក់របស់ឯកឧត្តមរដ្ឋមន្ត្រីក្រសួងមុខងារសាធារណៈក្នុងពិធីប្រកាសបើកយុទ្ធនាការចុះធ្វើជំរឿនមន្ត្រីជាក់ស្តែងនៅតាមរចនាសម្ព័ន្ធនៃអង្គភាពសុខាភិបាលមូលដ្ឋានស្ថិតនៅក្នុងខេត្តភូមិភាគនិរតី កាលពីព្រឹកថ្ងៃទី២១ ខែតុលា ឆ្នាំ២០២៦ នាសាលសន្និសីទបូកគោ។

កំពត៖ ថ្នាក់ដឹកនាំខេត្តកំពតបានណែនាំដល់មន្ទីរ អង្គភាព និងរដ្ឋបាលក្រុង ស្រុក ឱ្យពង្រឹងការគ្រប់គ្រង និងត្រួតពិនិត្យបញ្ជីវត្តមានរបស់មន្ត្រីឱ្យបានម៉ឺងម៉ាត់ ស្របតាមបទប្បញ្ញត្តិជាធរមាន។ ការណែនាំនេះធ្វើឡើងស្របពេលក្រសួងមុខងារសាធារណៈចាប់ផ្តើមចុះពិនិត្យ តាមដាន ជំរុញ និងវាយតម្លៃលើការគ្រប់គ្រងវត្តមានមន្ត្រីរាជការស៊ីវិល មន្ត្រីជាប់កិច្ចសន្យា និងមន្ត្រីពាក់ព័ន្ធនៅតាមរដ្ឋបាលថ្នាក់ក្រោមជាតិ ដើម្បីពង្រឹងវិន័យការងារ និងលើកកម្ពស់ប្រសិទ្ធភាពនៃការផ្តល់សេវាសាធារណៈជូនប្រជាពលរដ្ឋ។

កំពត៖ នាព្រឹកថ្ងៃទី១៩ ខែតុលា ឆ្នាំ២០២៦ លោក អ៉ឹម ច័ន្ទសោធន អភិបាលស្រុកទឹកឈូ បានអញ្ជើញជួបសំណេះសំណាល និងផ្តល់អនុសាសន៍ណែនាំសំខាន់ៗចំនួន ៣ចំណុច ដល់លោកគ្រូ អ្នកគ្រូដែលទើបតែបញ្ចប់វគ្គបណ្តុះបណ្តាលពីសាលាគរុកោសល្យ និងវិក្រឹតការខេត្តកំពត និងខេត្តតាកែវ នៅមុនថ្ងៃបើកបវេសនកាលឆ្នាំសិក្សា ២០២៦-២០២៧ ដើម្បីពង្រឹងប្រសិទ្ធភាពការងារបង្រៀន និងលើកកម្ពស់គុណភាពអប់រំតាមអង្គភាពសាលារៀននានាក្នុងមូលដ្ឋានស្រុកទឹកឈូ។

កំពត៖ នាព្រឹកថ្ងៃទី១៨ ខែតុលា ឆ្នាំ២០២៦ លោក អូន ខន អភិបាលស្រុកកំពង់ត្រាច និងលោក សោម យ៉ាន ប្រធានក្រុមប្រឹក្សាស្រុក បានដឹកនាំក្រុមការងាររដ្ឋបាលស្រុក និងអាជ្ញាធរមូលដ្ឋាន ចូលរួមរំលែកទុក្ខយ៉ាងក្រៀមក្រំ និងនាំយកថវិកាបច្ច័យចំនួន ១,០០០,០០០ រៀល ប្រគល់ជូនក្រុមគ្រួសារសពលោកតា ចឹក ស៊ង មេភូមិច្រនៀង ដែលបានទទួលមរណភាពដោយជរាពាធ នៅគេហដ្ឋានរបស់សព ស្ថិតក្នុងភូមិច្រនៀង ឃុំភ្នំប្រាសាទ ស្រុកកំពង់ត្រាច ខេត្តកំពត។