លោក ធាម សុផាត អភិបាលស្រុកភ្នំក្រវាញ បានអញ្ជើញចុះពិនិត្យដោយផ្ទាល់លើស្ថានភាពជាក់ស្តែងនៅទំនប់បង្ហៀរទឹកឈើតោក ដែលស្ថិតក្នុងឃុំសន្ទ្រែ ស្រុកភ្នំក្រវាញ ខេត្តពោធិ៍សាត់ នាថ្ងៃទី១៨ ខែកញ្ញា ឆ្នាំ២០២៦ ។

ពោធិ៍សាត់៖ លោក ផាយ ឡេង អភិបាល នៃគណៈអភិបាលក្រុងពោធិ៍សាត់ បានដឹកនាំក្រុមការងារពាក់ព័ន្ធ អញ្ជើញចូលរួមក្នុងសិក្ខាសាលាស្តីពី «នីតិវិធីជ្រើសរើសអ្នកផ្គត់ផ្គង់» សម្រាប់ការអនុវត្តកម្មវិធីផ្តល់អាហារតាមសាលារៀន ដោយប្រើប្រាស់កសិផលក្នុងសហគមន៍ កាលពីថ្ងៃទី១៧ ខែកញ្ញា ឆ្នាំ២០២៦ ។ សមាសភាពអញ្ជើញចូលរួមនាឱកាសនោះ រួមមាន៖ តំណាងរដ្ឋបាលក្រុងពោធិ៍សាត់ មន្ទីរអប់រំ យុវជន និងកីឡាខេត្ត និងមន្ទីរកសិកម្ម រុក្ខាប្រមាញ់ និងនេសាទខេត្តពោធិ៍សាត់។ សិក្ខាសាលានេះ រៀបចំឡើងក្នុងគោលបំណងពង្រឹងយន្តការ និងកំណត់នីតិវិធីច្បាស់លាស់ក្នុងការជ្រើសរើសអ្នកផ្គត់ផ្គង់គ្រឿងឧបភោគបរិភោគ និងកសិផលក្នុងស្រុក ប្រកបដោយតម្លាភាព និងប្រសិទ្ធភាព ដើម្បីគាំទ្រដល់ការផ្តល់អាហារូបត្ថម្ភដល់សិស្សានុសិស្សនៅតាមសាលារៀន ព្រមទាំងចូលរួមលើកកម្ពស់ជីវភាព និងទីផ្សារកសិផលរបស់ប្រជាកសិករក្នុងសហគមន៍ផ្ទាល់៕

ពោធិ៍សាត់៖ ដោយទទួលបានការយកចិត្តទុកដាក់ខ្ពស់ពីថ្នាក់ដឹកនាំ លោក ផាយ ឡេង អភិបាល នៃគណៈអភិបាលក្រុងពោធិ៍សាត់ បានចាត់តាំងក្រុមការងាររដ្ឋបាលក្រុង ចុះសួរសុខទុក្ខ និងលើកទឹកចិត្តដល់គ្រួសារវីរកងទ័ពជួរមុខ ដែលកំពុងសម្រាកព្យាបាលជំងឺនៅមន្ទីរពេទ្យបង្អែកខេត្តពោធិ៍សាត់ នាព្រឹកថ្ងៃសៅរ៍ ទី១៩ ខែកញ្ញា ឆ្នាំ២០២៦ ។ កុមារា គង់ សុវណ្ណរាជ អាយុ ៩ឆ្នាំ ដែលត្រូវជាកូនបង្កើតរបស់លោក គង់ វ៉ាន់ឌី វីរកងទ័ពជួរមុខប្រចាំការនៅមុំ២ ស្រុកភ្នំព្រឹក ខេត្តបាត់ដំបង ត្រូវបានបញ្ជូនមកសម្រាកព្យាបាលនៅមន្ទីរពេទ្យបង្អែកខេត្តពោធិ៍សាត់ បន្ទាប់ពីធ្លាក់ខ្លួនឈឺដោយសារជំងឺគ្រុនឈាម។ ក្រោមការយកចិត្តទុកដាក់មើលថែទាំយ៉ាងយកចិត្តទុកដាក់ និងដិតដល់ពីសំណាក់ក្រុមគ្រូពេទ្យ ពេលនេះស្ថានភាពសុខភាពរបស់កុមារា គង់ សុវណ្ណរាជ បានធូរស្រាលជាបណ្តើរៗហើយ។ ស្ថិតក្នុងឱកាសនោះ ក្រុមការងាររដ្ឋបាលក្រុងពោធិ៍សាត់ បានសម្តែងនូវការសួរសុខទុក្ខដោយក្តីនឹករឭក និងការដឹងគុណយ៉ាងជ្រាលជ្រៅចំពោះគ្រួសារវីរកងទ័ព ដែលបាននិងកំពុងលះបង់កម្លាំងកាយចិត្ត ក្នុងបេសកកម្មការពារបូរណភាពទឹកដីនៅជួរមុខយ៉ាងក្លាហាន៕

រដ្ឋបាលស្រុកវាលវែង បានទទួលបានថវិកាឧបត្ថម្ភចំនួន ១០,០០០,០០០រៀល (ដប់លានរៀលគត់) ពីឯកឧត្តម ជិត ប៉ុណ្ណារ៉ា ប្រធានក្រុមគ្រូពេទ្យភ្នែកស្ម័គ្រចិត្ត និងលោកជំទាវ យូ ស្រីលាភ ទីប្រឹក្សាក្រសួងមហាផ្ទៃ ដើម្បីរួមចំណែកក្នុងសកម្មភាពអភិវឌ្ឍន៍ និងកែលម្អសោភ័ណភាពក្នុងមូលដ្ឋាន។

អភិបាលស្រុកក្រគរ បានអញ្ជើញជាអធិបតីក្នុងកម្មវិធី «វេទិកាសាលារៀនយើង» នៅវិទ្យាល័យ ហ៊ុន សែន ក្រគរ ដើម្បីលើកកម្ពស់គុណភាពអប់រំ ដាស់តឿនសិស្សឱ្យខិតខំរៀនសូត្រ និងជៀសឆ្ងាយពីគ្រឿងញៀន/អបាយមុខ ព្រមទាំងពង្រឹងកិច្ចសហការរវាងអាជ្ញាធរ សាលារៀន និងសហគមន៍។

ក្រុមការងារលុបបំបាត់ជំងឺគ្រុនចាញ់ស្រុកភ្នំក្រវាញ និងស្រុកវាលវែង បានបើកកិច្ចប្រជុំប្រចាំត្រីមាសទី២ ដើម្បីបូកសរុបលទ្ធផល និងពង្រឹងវិធានការបង្ការ ទប់ស្កាត់ និងព្យាបាលជំងឺគ្រុនចាញ់ក្នុងមូលដ្ឋាន។