ព័ត៌មានក្នុងខេត្ត

ខេត្តកំពត៖ ឯកឧត្តម ទេព អស្នារិទ្ធ អនុរដ្ឋលេខាធិការដ្ឋាន និងជាអ្នកនាំពាក្យក្រសួងព័ត៌មានបានណែនាំដល់មន្ទីរព័ត៌មានខេត្តកំពតឱ្យរៀបចំផែនការគ្រប់គ្រងផលិតមាតិកាព័ត៌មានឱ្យបានច្បាស់លាស់ដើម្បីបម្រើដល់ការផ្សព្វផ្សាយព័ត៌មានឱ្យទាន់សភាពការណ៍និងឆ្លុះបញ្ចាំងពីវឌ្ឍនភាពគ្រប់វិស័យរបស់ខេត្ត។ ការណែនាំនេះ ធ្វើឡើងពេលដែលឯកឧត្តម រួមជាមួយឯកឧត្តម សោម កុសល អនុរដ្ឋលេខាធិការដ្ឋានក្រសួងព័ត៌មានទទួលបន្ទុកការងារមន្ទីរព័ត៌មានខេត្តកំពតអញ្ជើញដឹកនាំ កិច្ចប្រជុំតម្រង់ទិសការងារព័ត៌មាន និងសាធារណមតិ ដល់ថ្នាក់ដឹកនាំមន្ទីររាជការ នៃមន្ទីរព័ត៌មានខេត្តកំពតកាលពីថ្ងៃទី១៩ ខែមិថុនា ឆ្នាំ២០២៦ ។

កំពត៖ នាថ្ងៃទី២១ ខែមិថុនា ឆ្នាំ២០២៦ លោកជំទាវ មុយ វិរ័ត្ន ប្រធានប្រតិបត្តិ សាខាសមាគមនារីខេត្ត តំណាងលោកជំទាវ ហ៊ុន ចាន់ធី ម៉ៅ ធនិន ប្រធានកិត្តិយសសាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ខេត្តកំពត បានអញ្ជើញចូលរួមក្នុងវេទិកាផ្សព្វផ្សាយតម្រង់ទិស ក្រោមប្រធានបទ «កំណត់គោលដៅសិក្សា និងអាជីពការងារ» ជូនដល់យុវតីជាសិស្សានុសិស្សថ្នាក់ទី១០ និងទី១១ ដែលរៀបចំឡើងនៅវិទ្យាល័យហ៊ុនសែនបរិវាស ស្រុកបន្ទាយមាស ខេត្តកំពត។ នេះបើយោងតាមការផ្សព្វផ្សាយដោយផេកផ្លូវការ របស់សាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ខេត្តកំពត។

កំពត៖ រូបសំណាកបាតដៃ ដែលជាផលិតផលទេសចរណ៍ថ្មីដ៏ទាក់ទាញមួយក្នុងខេត្តកំពត បានលេចចេញជារូបរាងជិតពេញលេញហើយ គិតត្រឹមថ្ងៃទី២១ ខែមិថុនា ឆ្នាំ២០២៦នេះ។ រូបសំណាកដ៏ធំនេះ ត្រូវបានសាងសង់ឡើងនៅលើឆ្នេរខ្សាច់ព្រែកកំពង់បាយ ស្ថិតក្នុងក្រុងកំពត អមដោយទេសភាពដ៏ស្រស់ស្អាតនាពេលថ្ងៃហៀបលិច ដែលកំពុងទាក់ទាញចំណាប់អារម្មណ៍ពីប្រជាពលរដ្ឋ និងភ្ញៀវទេសចរ។

កំពត៖ នារសៀលថ្ងៃទី២០ ខែមិថុនា ឆ្នាំ២០២៦ លោកស្រី ហួត រី អនុប្រធានប្រតិបត្តិ សាខាសមាគមនារីខេត្ត តំណាងលោកជំទាវ ហ៊ុន ចាន់ធី ម៉ៅ ធនិន ប្រធានកិត្តិយសសាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ខេត្តកំពត បានអញ្ជើញចូលរួមក្នុងវេទិកាផ្សព្វផ្សាយតម្រង់ទិស ក្រោមប្រធានបទ «កំណត់គោលដៅសិក្សា និងអាជីពការងារ» ជូនដល់យុវតីជាសិស្សានុសិស្សថ្នាក់ទី១០ និងទី១១ ដែលរៀបចំឡើងនៅវិទ្យាល័យទូកមាស ស្រុកបន្ទាយមាស ខេត្តកំពត។ នេះបើយោងតាមការផ្សព្វផ្សាយដោយផេកផ្លូវការ របស់សាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ខេត្តកំពត។

ថ្នាក់ដឹកនាំក្រសួងព័ត៌មានបានជំរុញឱ្យមន្ត្រីព័ត៌មាន បង្កើនការច្នៃប្រឌិត និងប្រើប្រាស់បច្ចេកវិទ្យាទំនើបក្នុងការផលិតមាតិកាព័ត៌មាន ដើម្បីឱ្យការផ្សព្វផ្សាយកាន់តែមានភាពទាក់ទាញ ទាន់សម័យ និងអាចឈានទៅដល់សាធារណៈជន បានកាន់តែទូលំទូលាយ ជាពិសេសយុវវ័យ ដែលជាក្រុមអ្នកប្រើប្រាស់បណ្តាញសង្គមដ៏សកម្ម។

កំពត៖ អាជ្ញាធរក្រុងបូកគោបានបំពេញបេសកកម្ម និងអនុវត្តការងារត្រួតពិនិត្យនៅទីតាំងកំពង់ផែកំពតផត រួចរាល់អស់ជាច្រើនម៉ោង ទើបទំព័រហ្វេសប៊ុក (Page) ឈ្មោះ «សម្លេងអមតៈ» បានធ្វើការផ្សព្វផ្សាយព័ត៌មាន និងរូបភាពពាក់ព័ន្ធនឹងទីតាំងដដែលនេះ។ ករណីនេះបង្ហាញថា អាជ្ញាធរមូលដ្ឋានបានចាត់វិធានការ និងចុះអនុវត្តការងារជាក់ស្តែងមុនពេលមានការផ្សព្វផ្សាយព័ត៌មាននៅលើបណ្តាញសង្គម។

កំពត៖ យោងតាមផេកផ្លូវការរបស់រដ្ឋបាលក្រុងបូកគោបានឲ្យដឹងថា នៅព្រឹកថ្ងៃទី១៩ ខែមិថុនា ឆ្នាំ២០២៦ លោក ឡេន ឌឿន អភិបាលរងក្រុងបូកគោ តំណាងលោក លាង រឿនសុធី អភិបាលក្រុងបូកគោ បានដឹកនាំក្រុមការងារគណៈបញ្ជាការឯកភាពរដ្ឋបាលក្រុង ចុះត្រួតពិនិត្យនៅកំពង់ផែកំពតផត ស្ថិតក្នុងសង្កាត់កោះតូច ក្រុងបូកគោ ខេត្តកំពត។

កំពត៖ នៅរសៀលថ្ងៃទី១៩ ខែមិថុនា ឆ្នាំ២០២៦ ឯកឧត្តម ម៉ៅ ធនិន អភិបាលនៃគណៈអភិបាលខេត្តកំពត បានទទួលជួបសម្តែងការគួរសម ជាមួយលោកស្រី Abigail Fryer ឯកអគ្គរាជទូតរងនៃចក្រភពអង់គ្លេស និងអៀរឡង់ខាងជើង ប្រចាំព្រះរាជាណាចក្រកម្ពុជា ដើម្បីពិភាក្សាការងារមួយចំនួនលើវិស័យសំខាន់ៗ នាឱកាសដែលលោកស្រី និងគណៈប្រតិភូ អញ្ជើញបំពេញទស្សនកិច្ចផ្លូវការនៅខេត្តកំពត។

នៅថ្ងៃទី១៩ ខែមិថុនា ឆ្នាំ២០២៦ មន្ទីរព័ត៌មានខេត្តកំពត បានរៀបចំកិច្ចប្រជុំតម្រង់ទិសការងារព័ត៌មាន និងសាធារណមតិ ក្នុងគោលបំណងពង្រឹងការងារឲ្យមានប្រសិទ្ធភាពកាន់តែខ្ពស់ សមស្របទៅនឹងបរិបទសង្គម និងបច្ចេកវិទ្យាឌីជីថលបច្ចុប្បន្ន។ កិច្ចប្រជុំនេះ មានការចូលរួមពីឯកឧត្តម ទេព អស្នារិទ្ធ អនុរដ្ឋលេខាធិការដ្ឋាន និងជាអ្នកនាំពាក្យក្រសួងព័ត៌មាន រួមជាមួយឯកឧត្តម សោម កុសល អនុរដ្ឋលេខាធិការដ្ឋានក្រសួងព័ត៌មាន និងប្រធានមន្ទីរ ព្រមទាំងមន្ត្រីរាជការនៃមន្ទីរព័ត៌មានខេត្តកំពតប្រមាណ៤០នាក់។

ក្នុងយុទ្ធនាការ «និយាយថាទេចំពោះព័ត៌មានក្លែងក្លាយ» ជំហានទី២ ដែលរៀបចំឡើងនៅវិទ្យាល័យមិត្តភាពកម្ពុជា-ជប៉ុនកំពតក្រុង នាថ្ងៃពុធសប្តាហ៍នេះ ឯកឧត្តម ខៀវ រិទ្ធិភ័ណ្ឌ អភិបាលរងខេត្តកំពត បានលើកឡើងថា ព័ត៌មានក្លែងក្លាយ កំពុងក្លាយជាបញ្ហាមួយដែលបង្កគ្រោះថ្នាក់ដល់សង្គម ហើយទាមទារឱ្យមានការផ្សព្វផ្សាយអំពីគ្រោះថ្នាក់នៃបញ្ហានេះឱ្យបានទូលំទូលាយបន្ថែមទៀត។

សាខាកាកបាទក្រហមកម្ពុជា ខេត្តកំពត បានរៀបចំពិធីសាសនាប្រគេនទេយ្យទាន និងថ្វាយព្រះពរជ័យថ្វាយ សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ និងជាព្រះប្រធានកិត្តិយសកាកបាទក្រហមកម្ពុជា ក្នុងឱកាសគម្រប់ ៩០ យាងចូល៩១ ព្រះវស្សា ដោយមានការចូលរួមពីថ្នាក់ដឹកនាំ មន្ត្រី និងយុវជនកាកបាទក្រហមយ៉ាងច្រើនកុះករ។

មន្ទីរព័ត៌មានខេត្តកំពត បានអនុវត្តយុទ្ធនាការនិយាយថា«ទេចំពោះព័ត៌មានក្លែងក្លាយ»ជំហ៊ាន២ ដើម្បីបញ្ជ្រាបការយល់ដឹងបន្ថែមអំពីគ្រោះថ្នាក់នៃព័ត៌មានក្លែងក្លាយ ដល់សិស្សានុស្ស និងយុវជន តាមរយៈការរៀបចំវេទិកាផ្សព្វផ្សាយ នៅបរិវេនវិទ្យាល័យមិត្តភាពកម្ពុជា-ជប៉ុនកំពតក្រុង នាថ្ងៃទី១៧ ខែមិថុនា ឆ្នាំ២០២៦នេះ។