ព័ត៌មានក្នុងខេត្ត

ប្រធានប្រតិបត្តិនៃកម្មវិធីនៃអង្គការ Save The Children ប្រចាំកម្ពុជា បានបញ្ជាក់ថា អង្គការចាប់ផ្តើមចុះអនុវត្តគម្រោង “ការបង្កើនកាលានុវត្តភាពសម្រាប់អភិវឌ្ឍវិស័យសាកវប្បកម្មនៅកម្ពុជា” នៅខេត្តកំពតចាប់ពីថ្ងៃនេះទៅ។ តាមរយៈគម្រោង GROWTH នេះ នឹងជួយផ្តល់បច្ចេកទេសដាំបន្លែដល់កសិករ ឲ្យទទួលបានទិន្នផលខ្ពស់ មានភាពធន់នឹងការប្រែប្រួលអាកាសធាតុ មិនប៉ះពាល់បរិស្ថាន និងធានាសុវត្ថិភាពដល់កុមារលើគ្រប់ផ្នែក។

កំពត៖ ថ្នាក់ដឹកនាំកាកបាទក្រហមកម្ពុជា បាននាំយកអំណោយមនុស្សធម៌ និងសារអប់រំសុខភាព ជូនចាស់ជរា ជនពិការ ស្ត្រីមានផ្ទៃពោះ ស្ត្រីមានកូនតូច អ្នករស់នៅជាមួយមេរោគអេដស៍ និងគ្រួសារក្រីក្រងាយរងគ្រោះ ចំនួន១៨គ្រួសារ នៅក្រុងកំពត ដើម្បីជួយសម្រាលការលំបាក និងលើកទឹកចិត្តឱ្យពួកគេ ឲ្យបន្តថែរក្សាសុខភាព និងជីវភាពរស់នៅឲ្យល្អ។

កំពត៖ អាជ្ញាធរស្រុកទឹកឈូ អំពាវនាវដល់ប្រជាពលរដ្ឋឱ្យចូលរួមថែរក្សាផ្លូវ និងប្រព័ន្ធរំដោះទឹកនៅតាមមូលដ្ឋាន ដើម្បីបង្ការការកកស្ទះទឹក និងការលិចផ្លូវក្នុងរដូវវស្សា ខណៈអាជ្ញាធរកំពុងរៀបចំដាក់លូរំដោះទឹកនៅតាមចំណុចដែលមានបញ្ហា។

កំពត៖ កាលពីរៀលថ្ងៃទី១៧ ខែកញ្ញា ឆ្នាំ២០២៦ រដ្ឋបាលស្រុកជុំគិរី បានសហការជាមួយអាជ្ញាធរមូលដ្ឋានឃុំ ភូមិ និងភាគីពាក់ព័ន្ធ ចុះពិនិត្យ និងទប់ស្កាត់សកម្មភាពឈូសឆាយទន្ទ្រានយកដី និងឈូសឆាយបង្គោលព្រំអាងទឹក នៅតំបន់អាងទំនប់ភូមិអូរ ស្ថិតក្នុងភូមិអូរ ឃុំត្រពាងរាំង ស្រុកជុំគិរី ខេត្តកំពត ដើម្បីចូលរួមថែរក្សា និងការពារផ្ទៃអាងទឹក ដែលជាទ្រព្យសម្បត្តិសាធារណៈរបស់រដ្ឋឱ្យបានគង់វង្ស ទុកជាប្រយោជន៍រួម។

កំពត៖ នាព្រឹកថ្ងៃទី១៧ ខែកញ្ញា ឆ្នាំ២០២៦ លោកស្រី ង៉ែត សូរ្យសែង អភិបាលនៃគណៈអភិបាលស្រុកជុំគិរី បានទទួលជួបសំណេះសំណាលជាមួយ លោក សុខ សុភ័ក្រ្ត ម្ចាស់ដេប៉ូតេឡាសាខាកំពត នៅរដ្ឋបាលស្រុកជុំគិរី ដើម្បីសម្តែងការគួរសម ពិភាក្សាការងារអភិវឌ្ឍន៍ និងបានទទួលអំណោយជាអង្ករចំនួន ១តោន តាមរយៈការប្រគល់-ទទួលដោយផ្ទាល់ សម្រាប់ទ្រទ្រង់បេសកកម្មការងារមនុស្សធម៌ និងតម្រូវការចាំបាច់ផ្សេងៗក្នុងស្រុក។

អាជ្ញាធរស្រុកបន្ទាយមាសបានបញ្ជាក់ថា គិតតែក្នុងរយៈពេលពីឆ្នាំចុងក្រោយនេះ សមទ្ធិផលផ្លូវកៅស៊ូ និងផ្លូវបេតុងថ្មីជាច្រើនខ្សែនៅមូលដ្ឋាន បានលេចចេញរូបរាងខ្វាត់ខ្វែង ធ្វើឲ្យមូលដ្ឋានមានភាពស្រស់ស្អាតគួរឲ្យចង់រស់នៅ ងាយស្រួលធ្វើដំណើរ និងសម្រួលដល់ជីវភាពរស់នៅប្រចាំថ្ងៃឲ្យកាន់តែប្រសើរ។ ប្រជាពលរដ្ឋត្រេកអរយ៉ាងខ្លាំង ក្រោយពេលទទួលបានសមទ្ធិផលផ្លូវថ្នល់ល្អទាំងនេះ។

កំពត៖ ក្រសួងទេសចរណ៍ និងអាជ្ញាធរខេត្តកំពត បានសហការរៀបចំវគ្គបណ្តុះបណ្តាលគ្រូបង្គោលជាតិ នៃសេវាកម្មសណ្ឋាគារ ដើម្បីពង្រឹងសមត្ថភាពវិជ្ជាជីវៈ និងជំនាញបច្ចេកទេសឱ្យស្របតាមស្តង់ដារ និងក្របខណ្ឌទទួលស្គាល់គ្នាទៅវិញ ទៅមករបស់អាស៊ាន ក្នុងទិសដៅលើកកម្ពស់វិស័យទេសចរណ៍នៅខេត្តកំពត ឲ្យកាន់តែមានភាពទាក់ទាញភ្ញៀវ និងធានាដល់ភាពធន់នៅលើវិស័យទេសចរណ៍ ។

ក្រុមការងារគម្រោងព្រែកជីកហ្វូណនតេជោ បានកែសម្រួលនិយាមកា និងបោះបង្គោលព្រំដីមួយចំនួនឡើងវិញនៅខេត្តកំពត ក្នុងភូមិសាស្ត្រស្រុកបន្ទាយមាស និងកំពង់ត្រាច។ ការកែសម្រួលនិយាមកាថ្មីនេះ ដើម្បីកាត់បន្ថយចំនួនគ្រួសារ និងលំនៅដ្ឋាន ដែលរងផលប៉ះពាល់ឱ្យនៅតិចបំផុត ខណៈតម្រូវការបច្ចេកទេស និងសុវត្ថិភាពរបស់គម្រោងនៅតែត្រូវបានរក្សាដដែល។

កំពត៖ អគ្គនាយករង នៃអគ្គនាយកដ្ឋានរដ្ឋបាល ក្រសួងមហាផ្ទៃបានបញ្ជាក់ថា ដើម្បីផ្តល់ភាពងាយស្រួលក្នុងការងារគ្រប់គ្រងរដ្ឋបាល និងជំរុញការផ្តល់សេវាសាធារណៈផ្សេងៗជូនពលរដ្ឋតាមមូលដ្ឋានឱ្យបានល្អប្រសើរ ក្រសួងមហាផ្ទៃបានចេញសេចក្តីណែនាំជាច្រើនដើម្បីជំរុញឱ្យអាជ្ញាធររាជធានី-ខេត្ត រៀបចំកំណត់ព្រំប្រទល់រដ្ឋបាលឃុំ-សង្កាត់ ក្នុងដែនសមត្ថកិច្ចរបស់ខ្លួនឱ្យបានត្រឹមត្រូវ និងច្បាស់លាស់បំផុត។

លោក យិន ញន ប្រធានការិយាល័យអប់រំ យុវជន និងកីឡា ស្រុកបន្ទាយមាស បានបញ្ជាក់ថា ក្រោមការយកចិត្តទុកដាក់ពីរាជរដ្ឋាភិបាល ក្រសួងអប់រំ សប្បុរសជន និងអង្គការដៃគូ អគារសិក្សាបេតុងជាច្រើនខ្នងបានរីកដុះដាលជាបន្តបន្ទាប់។ បច្ចុប្បន្នស្រុកបន្ទាយមាសមានអគារសិក្សាសរុប ១៥៣ ខ្នង ស្មើនឹង ៦៧០ បន្ទប់។ ថ្នាក់រៀននីមួយៗមានទំហំធំទូលាយ បំពាក់ដោយតុ កៅអី បន្ទប់ទឹក អគ្គិសនី និងកុំព្យូទ័រ ដែលជួយឱ្យអត្រាចុះឈ្មោះចូលរៀនកើនឡើង អត្រាបោះបង់ការសិក្សាថយចុះ ហើយគុណភាពអប់រំកាន់តែល្អប្រសើរ។

លោក ទិត សារ៉ន មេឃុំខ្ជាយខាងត្បូង ស្រុកដងទង់ បានបញ្ជាក់ថា ការចោទប្រកាន់របស់ទំព័រហ្វេសប៊ុកឈ្មោះ «Bayongtime» ដែលថា ផ្លូវបេតុងអាមេ ១ខ្សែក្នុងភូមិឈ្លីតលើ សាងសង់គ្មានជើងទម្រកល់សរសៃដែកនោះ គឺមិនពិតឡើយ។ តាមការពិត ក្រុមហ៊ុនបានដាក់ជើងទម្រកល់សរសៃដែក និងសាងសង់តាមលក្ខណៈបច្ចេកទេសត្រឹមត្រូវ។

កំពត៖ រដ្ឋបាលស្រុកឈូក នៅថ្ងៃទី១៤ ខែកញ្ញា ឆ្នាំ២០២៦ នេះបានចេញសេចក្តីបំភ្លឺជាសាធារណៈឆ្លើយតបទៅនឹងការផ្សព្វផ្សាយលើបណ្តាញសង្គម ជុំវិញករណីលោកគ្រូ-អ្នកគ្រូ នៃវិទ្យាល័យ ហ៊ុន សែន ឈូក ចំនួន ២០គ្រួសារ បានស្នើសុំការជួយពន្លឿននីតិវិធីចេញប័ណ្ណកម្មសិទ្ធិដីធ្លីពីអាជ្ញាធរខេត្ត ដោយបញ្ជាក់ថា ករណីនេះអាជ្ញាធរបានរៀបចំសំណើជូនទៅក្រសួងសាម៉ីរួចរាល់ហើយ និងកំពុងរង់ចាំគោលការណ៍ណែនាំបន្ត។