ព័ត៌មានក្នុងខេត្ត

កំពត៖ អធិការស្រុកអង្គរជ័យ បានឲ្យដឹងថា៧ខែ ដើមឆ្នាំ២០២៦ ស្ថានភាពសន្តិសុខទូទៅក្នុងស្រុក មានភាពល្អប្រសើរ បទល្មើសផ្សេងៗមានការថយចុះច្រើន ដោយសារមានការចូលសហការពីគ្រប់មជ្ឍដ្ឋាន ពិសេសពលរដ្ឋ ប៉ុន្តែគ្រោះថ្នាក់ចរាចរណ៍កំពុងកើនឡើងគួរព្រួយបារម្ភ។ លោកអធិការអំពាវនាវដល់ប្រជាពលរដ្ឋ ពិសេសសិស្សចូលរួមគោរពច្បាប់ចរាចរណ៍ និងបើកបរដោយការប្រុងប្រយ័ត្ខខ្ពស់។

កំពត៖ ម្ចាស់កសិដ្ឋានដូងបានបញ្ជាក់ថា ពីមុនស្រុកអង្គរជ័យ គ្មានតំបន់ទេសចរណ៍ម្រាប់ឲ្យប្រជាពលរដ្ឋមកសម្រាកលម្ហែទេ ប៉ុន្តែបច្ចុប្បន្ន ដើម្បីឆ្លើយតបទៅនឹងការជំរុញលើកទឹកចិត្តរបស់អាជ្ញាធរខេត្ត ក៏ដូចជាស្រុកផងនោះ លោកបានកែច្នៃកសិដ្ឋានដូងរបស់ខ្លួនឲ្យទៅជាសួនកម្សាន្តដ៏ទាក់ទាញ ជាមួយនឹងទេសភាពធម្មជាតិ មានហាងកាហ្វេ អាហារដ្ឋាន និងខ្ចុះលម្ហែមាត់ទឹកជាដើម។ ប្រជាពលរដ្ឋស្រុកអង្គរជ័យភាគច្រើនបានស្គាល់កសិដ្ឋានដូងរបស់លោកថាជា “សួនកម្សាន្តកោះបេះដូង”។

កំពត៖ នាពេលថ្មីៗនេះ មន្ត្រីអប់រំ យុវជន និងកីឡា ស្រុកជុំគិរី បានថ្លែងថា ពីមួយឆ្នាំទៅមួយឆ្នាំ អត្រាបោះបង់ការសិក្សារបស់សិស្សបឋមសិក្សានៅទូទាំងស្រុក បានថយចុះមកត្រឹមជាង ១% ។ ជោគជ័យនេះ សម្រេចបានតាមរយៈការអភិវឌ្ឍហេដ្ឋារចនាសម្ព័ន្ធអប់រំ ការលើកកម្ពស់គុណភាពគ្រូ ការពង្រឹងទំនាក់ទំនងជាមួយសហគមន៍ និងការផ្តល់អាហារូបករណ៍ដល់សិស្សក្រីក្រ។

កំពត៖ ប្រជាពលរដ្ឋរស់នៅក្នុងស្រុកអង្គរជ័យ ខេត្តកំពត កំពុងប្រមូលផល «ទំពាំងត្រាច» ឬ «ទំពាំងក្រហម»នៅតាមតំបន់ភ្នំ ដែលជាបន្លែធម្មជាតិដុះតែម្ដងប៉ុណ្ណោះក្នុងមួយឆ្នាំ នៅចន្លោះខែឧសភា ដល់ខែកញ្ញា ពោលគឺនៅពេលមានភ្លៀងធ្លាក់ ដើម្បីយកមកកែច្នៃធ្វើជាមុខម្ហូបអាហារផ្សេងៗសម្រាប់បរិភោគ ដោយសារទំពាំងប្រភេទនេះផ្តល់នូវរសជាតិឆ្ងាញ់ប្លែកខុសពីទំពាំងទូទៅ។

កំពត៖ នៅថ្ងៃទី០៥ ខែសីហា ឆ្នាំ២០២៦នេះ មន្ទីរព័ត៌មានខេត្តកំពត បានសហការជាមួយរដ្ឋបាលស្រុកអង្គរជ័យ ចុះប្រមូលព័ត៌មាន និងផលិតមាតិកាផ្សព្វផ្សាយអំពីវឌ្ឍនភាព និងសក្តានុពលនានាក្នុងស្រុកអង្គរជ័យ តាមរយៈការប្រមូលទិន្នន័យផ្ទាល់លើវិស័យសំខាន់ៗ ដើម្បីទាក់ទាញអ្នកវិនិយោគ ភ្ញៀវទេសចរ និងលើកកម្ពស់កិត្តិនាមរបស់ស្រុក។

ភ្នំពេញ៖ ក្រសួងធនធានទឹក និងឧតុនិយម បានចេញសេចក្តីជូនដំណឹង អំពាវនាវឱ្យសាធារណជន និងអ្នកធ្វើដំណើរតាមផ្លូវគោក និងផ្លូវទឹក បង្កើនការប្រុងប្រយ័ត្នខ្ពស់ចំពោះបាតុភូតភ្លៀងធ្លាក់ ផ្គររន្ទះ និងខ្យល់កន្ត្រាក់ នៅទូទាំងប្រទេសកម្ពុជា ចាប់ពីថ្ងៃទី៥ ដល់ថ្ងៃទី១៥ ខែសីហា ឆ្នាំ២០២៦ ដោយសារតែឥទ្ធិពលនៃព្យុះទី១៤ ឈ្មោះ «កុជីរ៉ា» (Kujira) និងព្យុះទី១៣ ឈ្មោះ «ដុលហ្វីន» (Dolphin) បានបង្កើនកម្លាំងរបបខ្យល់មូសុងនិរតី ទោះបីជាប្រទេសកម្ពុជាមិនស្ថិតនៅក្នុងគន្លងផ្លូវដើរដោយផ្ទាល់នៃព្យុះទាំងពីរនេះក៏ដោយ។

ដើម្បីទទួលបាននូវព័ត៌មាន និងសុខទុក្ខពិតប្រាកដរបស់ប្រជាពលរដ្ឋ អភិបាលខេត្តកំពតបានជំរុញឱ្យអាជ្ញាធរមូលដ្ឋានត្រូវបញ្ចូលខ្លួនជាសមាជិកនៅគ្រប់ក្រុមគ្រួសារក្នុងមូលដ្ឋានរបស់ខ្លួន ដើម្បីបាននៅកៀកជាមួយប្រជាពលរដ្ឋ។ ទន្ទឹមនេះដែរ ឯកឧត្តមអភិបាលខេត្តក៏បានក្រើនរំលឹកដល់ស្មៀនឃុំ-សង្កាត់នៅទូទាំងខេត្តកំពត ត្រូវយកបេះដូងទៅបំរើប្រជាពលរដ្ឋ កុំមានការគាបសង្កត់ គេតប្រវ័ញ្ញផលប្រយោជន៍ពីពលរដ្ឋ ពិសេសត្រូវពិនិត្យឱ្យបានច្បាស់នូវអក្ខរាវិរុទ្ធពេលចុះសំបុត្រអត្រានុកោលដ្ឋានជូនពួកគាត់។

កំពត៖ រដ្ឋបាលស្រុកឈូក បានចេញសេចក្តីបំភ្លឺព័ត៌មាន នាថ្ងៃទី០៤ ខែសីហា ឆ្នាំ២០២៦ ដើម្បីបដិសេធជុំវិញការផ្សព្វផ្សាយលើបណ្តាញសង្គមហ្វេសប៊ុករបស់សារព័ត៌មាន រស្មីខេមបូឌាឡាយ៍ និង សារព័ត៌មាន ថ្មីៗ ប៉ុស្តិ៍ TV Online ដែលបានចោទប្រកាន់ថាមានការសាងសង់រោងចក្រលើដីបម្រុងទុកនៅភូមិពស់ពង ឃុំនារាយណ៍ ដោយអាជ្ញាធរបានបង្ហាញឯកសារផ្លូវការ ប្លង់កម្មសិទ្ធិ និងបញ្ជាក់ថាការសាងសង់នោះមានច្បាប់ត្រឹមត្រូវលើដីកម្មសិទ្ធិឯកជនពិតប្រាកដ។

កំពត៖ មន្ទីរបរិស្ថានខេត្តកំពត បានជូនដំណឹងដល់សាធារណជនអំពីស្ថានភាពគុណភាពខ្យល់កម្រិត «ល្អណាស់» នៅក្នុងក្រុងកំពត និងតាមបណ្តាខេត្តមួយចំនួនទៀត នាថ្ងៃទី៤ ខែសីហា ឆ្នាំ២០២៦ បន្ទាប់ពីលទ្ធផលនៃការតាមដានបង្ហាញថា កំហាប់ភាគល្អិតនិចលក្នុងខ្យល់មានកម្រិតទាបជាងស្តង់ដារកំណត់ តាមរយៈការវាស់វែង និងគណនាសន្ទស្សន៍គុណភាពខ្យល់ (AQI) របស់ក្រសួងបរិស្ថានក្នុងរយៈពេល ២៤ ម៉ោងចុងក្រោយ។

កំពត៖ នាព្រឹកថ្ងៃទី០៤ ខែសីហា ឆ្នាំ២០២៦ លោក អ៉ឹម ច័ន្ទសោធន អនុប្រធានសហភាពសហព័ន្ធយុវជនកម្ពុជា (ស.ស.យ.ក) ខេត្តកំពត និងជាប្រធាន ស.ស.យ.ក ស្រុកទឹកឈូ បានដឹកនាំក្រុមគ្រួសារ ស.ស.យ.ក ស្រុក ពិភាក្សា និងរៀបចំ «យុទ្ធនាការចែករំលែកក្តីស្រឡាញ់» នៅស្រុកទឹកឈូ ដើម្បីជួយសម្រួល និងគាំទ្រដល់បេក្ខជនប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំ២០២៦ តាមរយៈការផ្តល់សេវាផ្ញើមធ្យោបាយធ្វើដំណើរ អាហារ ទឹកសុទ្ធ និងកន្លែងស្នាក់នៅដោយមិនគិតថ្លៃ។ នេះបើតាមការផ្សាយក្នុងផេករបស់ លោក អ៉ឹម ច័ន្ទសោធន អភិបាលស្រុកទឹកឈូ។

កំពត៖ អនុប្រធានអចិន្ត្រៃយ៍គណៈកម្មាធិការសាខាកាកបាទក្រហមកម្ពុជាខេត្តកំពត បានជំរុញសិស្សានុសិស្ស យុវជន និងប្រជាពលរដ្ឋ ចូលរួមដាំ និងថែរក្សាដើមឈើឱ្យបានច្រើន ដើម្បីបង្កើនបរិស្ថានបៃតង កាត់បន្ថយផលប៉ះពាល់ពីការប្រែប្រួលអាកាសធាតុ និងបន្សល់ទុកធនធានធម្មជាតិដ៏មានតម្លៃសម្រាប់មនុស្សជំនាន់ក្រោយ ហើយថា «ដាំដើមឈើថ្ងៃនេះ ដើម្បីជីវិតថ្ងៃស្អែក»។

កំពត៖ នៅព្រឹកថ្ងៃទី៤ ខែសីហា ឆ្នាំ២០២៦ ឯកឧត្តម ម៉ៅ ធនិន អភិបាលនៃគណៈអភិបាលខេត្តកំពត បានអញ្ជើញជួបសម្របសម្រួល និងដោះស្រាយក្តីកង្វល់ដោយផ្ទាល់ជូនប្រជាពលរដ្ឋមកពីស្រុកអង្គរជ័យ និងក្រុងកំពត នៅសាលាខេត្តកំពត មុនពេលចូលរួមដឹកនាំកិច្ចប្រជុំ ដើម្បីជួយកាត់បន្ថយការលំបាក សម្រួលការធ្វើដំណើរ និងផ្តល់យោបល់តម្រង់ទិសផ្លូវច្បាប់លើបញ្ហាប្រឈមផ្សេងៗរបស់ប្រជាពលរដ្ឋ។ នេះបើយោងតាមការផ្សាយរបស់ផេក«រដ្ឋបាលខេត្តកំពត»។