ព័ត៌មានក្នុងខេត្ត

កំពត៖ នៅព្រឹកថ្ងៃទី១១ ខែកញ្ញា ឆ្នាំ២០២៦ ឯកឧត្តម ខាន់ សុខា អភិបាលរងខេត្តកំពត តំណាងដ៏ខ្ពង់ខ្ពស់ឯកឧត្តមបណ្ឌិត ម៉ៅ ធនិន អភិបាលខេត្ត និងលោក ខឹម សំអាត អគ្គនាយករងនៃមូលនិធិជាតិជំនួយសង្គម បានអញ្ជើញជាគណៈអធិបតីក្នុងពិធីបើកវគ្គបណ្តុះបណ្តាលស្តីពី «ការអនុវត្តកម្មវិធីឧបត្ថម្ភសាច់ប្រាក់របស់រាជរដ្ឋាភិបាល» នៅសាលសន្និសីទបូកគោ ដើម្បីពង្រឹងការយល់ដឹង និងសមត្ថភាពរបស់មន្ត្រីពាក់ព័ន្ធ ក្នុងការអនុវត្តការផ្តល់ប្រាក់ឧបត្ថម្ភជូនគ្រួសារក្រីក្រ គ្រួសារងាយរងហានិភ័យ និងអ្នកប្រកបរបររត់ម៉ូតូកង់បី ដែលកំពុងរងផលប៉ះពាល់ពីសម្ពាធថ្លៃប្រេង និងឧស្ម័ន។

ប្រជាពលរដ្ឋ និងអាជ្ញាធរនៅស្រុកកំពង់ត្រាចបានសម្តែងសេចក្តីត្រេកអរ ចំពោះមូលដ្ឋានរបស់ពួកគាត់ មានការអភិវឌ្ឍរីកចម្រើនជាលំដាប់ ពិសេសហេដ្ឋារចនាសម្ព័ន្ធផ្លូវបេតុង ដែលបាននិងកំពុងលើកកម្ពស់ជីវភាព និងការរស់នៅ ឲ្យកាន់តែមានភាពល្អប្រសើរ និងស៊ីវីឡៃ។ ពួកគាត់បានថ្លែងអំណរគុណដល់រាជរដ្ឋាភិបាល និងថ្នាក់ដឹកនាំគ្រប់លំដាប់ថ្នាក់ ដែលតែងតែគិតគូរដល់សុខទុក្ខរបស់ប្រជាពលរដ្ឋ។

កំពត៖ នៅថ្ងៃទី១១ ខែកញ្ញា ឆ្នាំ២០២៦ រដ្ឋបាលស្រុកបន្ទាយមាស បានសហការរៀបចំដំណើរការទូទាត់ប្រាក់សំណងដីធ្លីជូនដល់ប្រជាពលរដ្ឋចំនួន ២៩ គ្រួសារ ដែលមានដីកម្មសិទ្ធិស្ថិតក្នុងដែនអាជ្ញាបណ្ណ និងដែនសុវត្ថិភាពរបស់ក្រុមហ៊ុន ជីបម៉ុង អ៊ីនស៊ី ស៊ីមេន ខបភើរេសិន (CMIC) បន្ទាប់ពីភាគីទាំងពីរបានសម្រេចកិច្ចព្រមព្រៀងជាឯកច្ឆន្ទលើតម្លៃសំណងសមរម្យ និងអាចទទួលយកបានទាំងសងខាង តាមរយៈការសម្របសម្រួលដោះស្រាយដោយសន្តិវិធី។

កំពត៖ នាព្រឹកថ្ងៃទី១១ ខែកញ្ញា ឆ្នាំ២០២៦ លោក អែត សារិទ្ធិ អភិបាលរងក្រុងកំពត ដោយទទួលបានការចាត់តាំងពីលោកស្រី ងិន ផលរ័ត្ន អភិបាលនៃគណៈអភិបាលក្រុង បានដឹកនាំក្រុមការងារគណៈបញ្ជាការឯកភាពរដ្ឋបាលក្រុងកំពត ចុះរៀបចំសណ្តាប់ធ្នាប់សាធារណៈនៅតំបន់ជុំវិញផ្សារសាមគ្គី ក្រុងកំពត ដើម្បីលុបបំបាត់ការលក់ដូរអនាធិបតេយ្យ និងសម្រួលចរាចរណ៍ជូនប្រជាពលរដ្ឋ។

កំពត៖ នៅថ្ងៃទី១២ ខែកញ្ញា ឆ្នាំ២០២៦ លោកស្រី ងិន ផលរ័ត្ន អភិបាលនៃគណៈអភិបាលក្រុងកំពត បានចុះជួបសំណេះសំណាល សួរសុខទុក្ខ និងចែកប័ណ្ណព័ត៌មានសម្រាប់ការពិនិត្យបញ្ជីឈ្មោះបោះឆ្នោត ជូនដល់បងប្អូនប្រជាពលរដ្ឋនៅតាមសង្កាត់ទាំង៥ ក្នុងក្រុងកំពត ក្នុងគោលបំណងសម្រួលដល់ការផ្ទៀងផ្ទាត់ឈ្មោះបោះឆ្នោតរបស់ប្រជាពលរដ្ឋ ព្រមទាំងបានផ្ទាល់ដៃជូននូវអំណោយគ្រឿងឧបភោគបរិភោគដល់គ្រួសារដែលមានជីវភាពជួបការលំបាកចំនួន ១០០គ្រួសារ។

កំពត៖ នៅថ្ងៃទី១០ ខែកញ្ញា ឆ្នាំ២០២៦ លោក ស្វាយ មិត្ត នាយករដ្ឋបាលសាលាក្រុងកំពត តំណាងឱ្យលោកស្រី ងិន ផលរ័ត្ន អភិបាលនៃគណៈអភិបាលក្រុងកំពត បាននាំយកថវិកាឧបត្ថម្ភចំនួន ៥០០,០០០រៀល (ហាសិបម៉ឺនរៀល) ប្រគល់ជូនលោកស្រីប្រធានមណ្ឌលសុខភាពក្រាំងអំពិល ដើម្បប្រើប្រាស់ក្នុងការរៀបចំប្រព័ន្ធរំដោះទឹកនៅក្នុងបរិវេណមណ្ឌលសុខភាព ដើម្បីសម្រួលដល់ការផ្តល់សេវាសុខាភិបាលជូនប្រជាពលរដ្ឋ។

កំពត៖ នៅរសៀលថ្ងៃទី១២ ខែកញ្ញា ឆ្នាំ២០២៦ រដ្ឋបាលសង្កាត់អណ្ដូងខ្មែរ បានរៀបចំពិធីចែកអំណោយមនុស្សធម៌ជូនដល់ប្រជាពលរដ្ឋចំនួន ៣៨៥ គ្រួសារ មកពីភូមិទាំង៥ ស្ថិតក្នុងសង្កាត់អណ្ដូងខ្មែរ ក្រុងកំពត ដើម្បីជួយសម្រាលជីវភាព និងការលំបាករបស់ប្រជាពលរដ្ឋក្នុងមូលដ្ឋាន។

កំពត៖ កាលពីរសៀលថ្ងៃទី១១ ខែកញ្ញា ឆ្នាំ២០២៦ រដ្ឋបាលសង្កាត់អណ្ដូងខ្មែរ បានរៀបចំវេទិកាសាធារណៈមួយនៅក្នុងភូមិតាដិប ក្រុងកំពត ដើម្បីបើកឱកាសឱ្យប្រជាពលរដ្ឋលើកឡើងដោយផ្ទាល់នូវកង្វល់ បញ្ហាប្រឈម និងសំណើសំណូមពរផ្សេងៗ ក្នុងគោលបំណងរួមគ្នាស្វែងរកដំណោះស្រាយអភិវឌ្ឍមូលដ្ឋាន។

អធិការស្រុកបន្ទាយមាសបានបញ្ជាក់ថា រយៈពេល៩ខែ ឆ្នាំ២០២៦ សមត្ថកិច្ចជំនាញបាន បំពេញបែបបទធ្វើអត្តសញ្ញាណប័ណ្ណសញ្ជាតិខ្មែរ ជូនប្រជាពលរដ្ឋចំនួន១៤,០៨៥នាក់ ព្រមទាំងចែកជូនអត្តសញ្ញាណប័ណ្ណដែលបានទទួលពីការិយាល័យជំនាញចំនួន១៣,០៩៦សន្លឹក។ ពលរដ្ឋបានសម្តែងសេចក្តីសប្បាយរីករាយ និងកក់ក្តៅក្នុងការមកស្នើរ និងទទួលសេវានៅអធិកាដ្ឋាន ក៏ដូចជាប៉ុស្តិ៍រដ្ឋបាល។

អាជ្ញាធរស្រុកបន្ទាយមាសបានបញ្ជាក់ថា រដ្ឋបាលស្រុកបាន និងកំពុងរៀបចំតំបន់ផ្លូវជាតិលេខ៣១ ជាប់ជួរភ្នំបន្ទាយមាស ឲ្យក្លាយទៅជាតំបន់ទេសចរណ៍ដ៏ទាក់ទាញសម្រាប់ភ្ញៀវជាតិ និងអន្តរជាតិ ដោយសារតំបន់នោះ មានទេសភាពស្អាត លម្អដោយធម្មជាតិវាលស្រែចម្ការ  ទេសភាពភ្នំ  ផ្លូវរថភ្លើង ប្រឡាយទឹក និងគុហារដែលជាជម្រកហ្វូងប្រចៀវរាប់ម៉ឺនក្បាល សម្រាប់ឲ្យភ្ញៀវទស្សនា។

កំពត៖ សមត្ថកិច្ចនគរបាលស្រុកបន្ទាយមាស បានឱ្យដឹងថា ស្ថានភាពសន្តិសុខ សណ្តាប់ធ្នាប់សាធារណៈនៅក្នុងមូលដ្ឋាន មានភាពល្អប្រសើរ ខណៈបទល្មើសផ្សេងៗ និងគ្រោះថ្នាក់ចរាចរណ៍ ត្រូវបានបង្ការ ទប់ស្កាត់ និងបង្ក្រាបទាន់ពេលវេលា រហូតមានការថយចុះច្រើន។ យ៉ាងណាក៏ដោយ អាជ្ញាធរ និងកម្លាំងនគរបាលនៅតែបន្តបង្កើនការផ្សព្វផ្សាយអប់រំប្រជាពលរដ្ឋ និងសិស្សានុសិស្ស ដើម្បីឲ្យពួកគេចូលរួមចំណែករក្សាសន្តិសុខ និងសុវត្ថិភាពក្នុងសហគមន៍របស់ខ្លួន។

ប្រជាពលរដ្ឋនៅស្រុកបន្ទាយមាសបានលើកឡើងថា ការបង្កើតយន្តការច្រកចេញចូលតែមួយនៅថ្នាក់ស្រុក គឺជាយន្តការបង្ខិតសេវាកាន់តែកៀកកិត ងាយស្រួល លឿនរហ័ស និងជឿទុកចិត្តបាន ដោយការស្នើសុំ និងទទួលសេវានៅហ្នឹងកន្លែងតែមួយ  រួមចំណែកកាត់បន្ថយពេលវេលា និងថវិការបស់ពួកគាត់ ឆ្លើយតបសេចក្ដីត្រូវការរបស់ប្រជាពលរដ្ឋទូទៅ ។