ព័ត៌មានក្នុងខេត្ត

កំពត៖ រដ្ឋបាលស្រុកឈូក នៅថ្ងៃទី០១ ខែតុលា ឆ្នាំ២០២៦នេះ បានប្រកាសជូនដំណឹងតាមរយៈទំព័រហ្វេសប៊ុកផ្លូវការ ដល់យុវជនក្នុងដែនសមត្ថកិច្ច ឱ្យអញ្ជើញមកទទួល និងដាក់ពាក្យសុំចូលបំពេញកាតព្វកិច្ចយោធា នៅមូលដ្ឋានកងរាជអាវុធហត្ថស្រុកឈូក ស្ថិតក្នុងភូមិព្រេច ឃុំបឹងនិមល ស្រុកឈូក ខេត្តកំពត ចាប់ពីថ្ងៃចន្ទ ដល់ថ្ងៃសៅរ៍ រៀងរាល់ម៉ោងធ្វើការ ដើម្បីចូលរួមបំពេញកាតព្វកិច្ចការពារជាតិ និងបម្រើមាតុភូមិ។

កំពត៖ អាជ្ញាធរខេត្តកំពត និងស្ថាប័នអប់រំឯកជន បានលើកទឹកចិត្តអាណាព្យាបាលឱ្យចំណាយពេលវេលាតាមដាន ណែនាំ និងជំរុញការសិក្សារបស់កូនៗ ខណៈសិស្សានុសិស្សត្រូវបន្តគោរពវិន័យ វិនិយោគពេលវេលាលើការរៀនសូត្រ និងស្វែងរកចំណេះដឹងថ្មីៗ ជាពិសេសភាសាបរទេស និងបច្ចេកវិទ្យា ដើម្បីពង្រឹងសមត្ថភាព និងត្រៀមខ្លួនសម្រាប់ការសិក្សា និងការងារនាពេលអនាគត។

កំពត៖ យុវតីនៅខេត្តកំពតបញ្ជាក់ថា បច្ចុប្បន្ន ស្ត្រីក៏មានសិទ្ធិ និងមានស្មារតីស្នេហាជាតិ មាតុភូមិ ដូចបុរសដែរ។ ហើយទិដ្ឋភាពដ៏ឈឺចាប់ នៃការឈ្លានពានរបស់ទាហានសៀមមកលើប្រជាជនកម្ពុជា ជាកត្តាជំរុញ ចិត្តឲ្យពួកគេមានភាពអង់អាចក្លាហាន ក្នុងការមកសុំស្ម័គ្រចូលបំពេញកាតព្វកិច្ចយោធា។យុវតីដែលបានមកទទួលពាក្យ បានថ្លែងអំណរគុណដល់រាជរដ្ឋភិបាលដែលបើកឱកាសដល់ស្ត្រី បានបង្ហាញអំពីស្មារតី និងសមត្ថភាព ដើម្បីរួមចំណែកអភិវឌ្ឍវិស័យោធា និងការពារជាតិ ដូចបុរសដែរ។

កំពត៖ ថ្ងៃនេះជាថ្ងៃដំបូង នៃការបើកផ្តល់ពាក្យសុំចូលបំពេញកាតព្វកិច្ចយោធា ហើយនៅតាមមូលដ្ឋានកងរាជអាវុធហត្ថ ក្រុង ស្រុក នៃខេត្តកំពត មានក្រុមយុវជនដែលជាសិស្ស ជាបុគ្គលិកក្រុមហ៊ុន បាននាំគ្នាមកទទួលពាក្យសុំជាបណ្តើរៗហើយ។ ក្រុមយុវជនយល់ឃើញថា ការមកសុំពាក្យចូលបំពេញកាតព្វកិច្ចមុនគេនេះ គឺដោយសារស្មារតីស្រឡាញ់ពេញចិត្ត ចំពោះកិច្ចការងារការពារជាតិ មាតុភូមិ និងជាចំណែកអភិវឌ្ឍខ្លួន ឲ្យក្លាយជាធនធានយោធិនល្អម្នាក់ នាពេលអនាគត។

កំពត៖ អភិបាលខេត្តកំពត ណែនាំមន្ត្រីជំនាញ និងអាជ្ញាធរគ្រប់មូលដ្ឋាន ឱ្យយកសុខទុក្ខ និងប្រយោជន៍របស់ប្រជាពលរដ្ឋជាធំ ដោយមិនត្រូវយកបញ្ហាបច្ចេកទេសមកធ្វើជាលេស ឬដាក់បន្ទុកលើប្រជាពលរដ្ឋឡើយ។ ទន្ទឹមនោះ ត្រូវពន្លឿនការដោះស្រាយបញ្ហាសេវាសាធារណៈ សន្តិសុខ សណ្តាប់ធ្នាប់ និងត្រៀមលក្ខណៈឱ្យបានល្អក្នុងឱកាសបុណ្យកាន់បិណ្ឌ និងភ្ជុំបិណ្ឌ ដើម្បីផ្តល់ភាពកក់ក្តៅជូនប្រជាពលរដ្ឋ និងភ្ញៀវទេសចរ។

កំពត៖ នៅព្រឹកថ្ងៃទី២៩ ខែកញ្ញា ឆ្នាំ២០២៦ អាជ្ញាធរស្រុកទឹកឈូ និងអាជ្ញាធរមូលដ្ឋានឃុំស្ទឹងកែវ បានចុះត្រួតពិនិត្យផ្ទាល់ និងចាត់ចែងក្រុមការងារប្រើប្រាស់គ្រឿងចក្រ ដើម្បីកាយរំដោះមុខទឹកជំនន់ជាបន្ទាន់ នៅចំណុចភូមិអន្លង់ម៉ាក់ប្រាង្គ ឃុំស្ទឹងកែវ ស្រុកទឹកឈូ ខេត្តកំពត បន្ទាប់ពីប្រព័ន្ធលូស្ទះបង្កឲ្យមានទឹកជំនន់លិចលង់ផលដំណាំកសិកម្មរបស់ប្រជាពលរដ្ឋ។

កំពត៖ កាលពីរសៀលថ្ងៃទី២៩ ខែកញ្ញា ឆ្នាំ២០២៦ ឯកឧត្តមបណ្ឌិត ម៉ៅ ធនិន អភិបាលនៃគណៈអភិបាលខេត្តកំពត បានចុះពិនិត្យស្ថានភាពអនាម័យ និងបរិស្ថានដោយផ្ទាល់ នៅរមណីយដ្ឋានស្រះឈូក ស្ថិតក្នុងក្រុងកំពត ដើម្បីរៀបចំផែនការកែលម្អ និងអភិវឌ្ឍទីតាំងស្រះបុរាណមួយនេះឱ្យក្លាយជាតំបន់ទេសចរណ៍បន្ថែមមួយទៀត សំដៅលើកកម្ពស់សោភ័ណភាពក្រុង និងបង្កើនទីតាំងសម្រាកកម្សាន្តជូនប្រជាពលរដ្ឋ និងភ្ញៀវទេសចរ។

កំពត៖ នៅរសៀលថ្ងៃទី២៩ ខែកញ្ញា ឆ្នាំ២០២៦ លោក អ៉ឹម ច័ន្ទសោធន អភិបាលនៃគណៈអភិបាលស្រុកទឹកឈូ និងជាប្រធានគណៈកម្មាធិការ អ.ន.ក.ស្រុក បានដឹកនាំក្រុមការងារស្រុក និងសាខា អ.ន.ក. ឃុំព្រៃថ្នង និងឃុំជុំគ្រៀល ចុះប្រគល់ថវិកាបេឡាមរណៈសង្គ្រោះសរុបចំនួន ១២,០០០,០០រៀល (ដប់ពីរលានរៀលគត់) ជូនដល់គ្រួសារនៃសពចំនួន ០៣គ្រួសារ ដោយក្នុងមួយគ្រួសារទទួលបាន ៤,០០០,០០០រៀល (បួនលានរៀលគត់) ដើម្បីចូលរួមរំលែកទុក្ខ និងជួយសម្រាលបន្ទុកគ្រួសារ ស្ថិតនៅក្នុងភូមិសាស្ត្រស្រុកទឹកឈូ ខេត្តកំពត។

កំពត៖ ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពត ព្រមទាំងថ្នាក់ដឹកនាំខេត្ត បានចូលរួមធ្វើបុណ្យកាន់បិណ្ឌទី២ នៅវត្តជុំគ្រៀល ស្រុកទឹកឈូ ខេត្តកំពត ដោយបានប្រគេនទេយ្យទាន និងបច្ច័យ និងរាប់បាត្រ ប្រគេនព្រះសង្ឃ ក្នុងស្មារតីថែរក្សាប្រពៃណី និងទំនៀមទម្លាប់ដ៏ល្អប្រពៃរបស់ជាតិ។

កំពត៖ ថ្នាក់ដឹកនាំក្រសួងទេសចរណ៍ និងអាជ្ញាធរខេត្តកំពត បានអំពាវនាវដល់គ្រប់ភាគីពាក់ព័ន្ធ ឱ្យរួមគ្នាពង្រឹងគុណភាពសេវា បង្កើតផលិតផល និងបទពិសោធន៍ទេសចរណ៍ថ្មីៗ ប្រើប្រាស់បច្ចេកវិទ្យាឌីជីថល និងរក្សាខេត្តឱ្យមានភាពស្អាត ឆ្លាត បៃតង និងមានសុវត្ថិភាព ដើម្បីបង្កើនភាពទាក់ទាញ ពន្យារពេលស្នាក់នៅ និងជំរុញការចំណាយរបស់ភ្ញៀវទេសចរ ឲ្យបានច្រើនបំផុត ។

កំពត៖ នាព្រឹកថ្ងៃទី៣០ ខែកញ្ញា ឆ្នាំ២០២៦ ឯកឧត្តម ម៉ៅ ធនិន អភិបាលនៃគណៈអភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្តកំពត បានអញ្ជើញជាអធិបតីដឹកនាំកិច្ចប្រជុំគណៈបញ្ជាការឯកភាពរដ្ឋបាលខេត្ត នៅសាលសន្និសីទបូកគោ ដើម្បីពិនិត្យ និងពង្រឹងការងារសន្តិសុខ សណ្ដាប់ធ្នាប់សាធារណៈ ព្រមទាំងការងារគ្រប់គ្រងរដ្ឋបាលនៅតាមមន្ទីរ-អង្គភាព កំពង់ផែ និងទីផ្សារនានាទូទាំងខេត្ត តាមរយៈការពិភាក្សា និងតម្រង់ទិសដោយផ្ទាល់រវាងអាជ្ញាធរដែនដី សមត្ថកិច្ច និងតំណាងវិស័យពាក់ព័ន្ធ។

កំពត៖ ឯកឧត្តមបណ្ឌិត ប៉ែន ស៊ីម៉ន អ្នកតំណាងរាស្ត្រមណ្ឌលកំពត សមាជិកអចិន្ត្រៃយ៍ និងជាប្រធានគណៈកម្មការទី១០ នៃរដ្ឋសភា បានលើកឡើងថា ចំណេះដឹងគឺជាទ្រព្យសម្បត្តិដ៏មានតម្លៃបំផុតដែលមិនអាចខ្វះបាន សម្រាប់មនុស្សក្នុងសម័យកាលបច្ចុប្បន្ន។ ឯកឧត្តមបានជំរុញឱ្យសិស្សានុសិស្សបន្តខិតខំសិក្សារៀនសូត្រ អភិវឌ្ឍសមត្ថភាព និងយកចំណេះដឹងទៅបម្រើសង្គម និងចូលរួមអភិវឌ្ឍប្រទេសជាតិ។